വിമാനയാത്ര വിലക്ക്​ നീക്കൽ: മന്ത്രിസഭ യോഗത്തിൽ തീരുമാനമില്ല

Times of Kuwait

കുവൈത്ത്​ സിറ്റി: പ്രവാസികൾ ഏറെ പ്രതീക്ഷയോടെ കാത്തിരുന്ന വിമാനയാത്ര വിലക്ക് നീക്കുന്നത് സംബന്ധിച്ച് മന്ത്രിസഭായോഗത്തിൽ തീരുമാനമായില്ല.
34 രാജ്യങ്ങളിൽനിന്ന്​ നേരിട്ട്​ കുവൈത്തിലേക്കുള്ള വിമാന സർവീസുകൾക്കാണ് നിലവിൽ വിലക്ക്​. തിങ്കളാഴ്​ച ചേർന്ന മന്ത്രിസഭ യോഗത്തിലും ഇതുസംബന്ധിച്ച്​ തീരുമാനമായില്ല. ചർച്ചകൾ ശുഭകരമാണെങ്കിലും തീരുമാനം വൈകുകയാണ്​. പ്രധാനമന്ത്രി ശൈഖ്​ സബാഹ്​ ഖാലിദ്​ അൽ ഹമദ്​ അസ്സബാഹ്​ കുവൈത്ത്​ എയർവേ​സ്​, ജസീറ എയർവേ​സ്​ മേധാവികളുമായും വ്യോമയാന വകുപ്പ്​ മേധാവിയുമായും പ്രത്യേകം കൂടിക്കാഴ്​ച നടത്തിയത്​ പ്രതീക്ഷ വർധിപ്പിച്ചിരുന്നു.

ഏഴുദിവസം യാത്രക്കാരൻ സ്വന്തം ചെലവിൽ ഇൻസ്​റ്റിറ്റ്യൂഷനൽ ക്വാറൻറീനിൽ കഴിയണമെന്ന വ്യവസ്ഥയോടെ കുവൈത്തി​ലേക്ക്​ നേരിട്ട്​ വരാൻ അനുവദിക്കണമെന്ന നിർദേശമാണ്​ വിമാന കമ്പനികൾ മുന്നോട്ടുവെച്ചത്​. നിർദേശം പഠിക്കുമെന്ന്​ ആരോഗ്യമന്ത്രി പ്രഖ്യാപിച്ചതും തുടർന്ന്​ പ്രധാനമന്ത്രി വിമാനക്കമ്പനികളുമായും വ്യോമയാന വകുപ്പ്​ മേധാവിയുമായും ചർച്ച നടത്തിയതും പ്രവാസി സമൂഹം പ്രതീക്ഷയോടെ നോക്കിക്കണ്ടിരുന്നു. ഈ ആഴ്ചയിലെ മന്ത്രിസഭായോഗത്തിൽ നിർണായക തീരുമാനം കൈക്കൊള്ളും എന്ന് പ്രതീക്ഷിച്ചിരുന്നെങ്കിലും തീരുമാനമാകാഞ്ഞത് കുവൈത്തിലേക്കുള്ള തിരിച്ചുവരവിന് ഒരുങ്ങുന്ന പ്രവാസികൾക്ക് നിരാശ പകർന്നു.