രണ്ടിൽ കൂടുതൽ കാറുകൾ കൈവശം വയ്ക്കുന്നതിൽ നിന്ന് പ്രവാസികൾക്ക്  വിലക്കേർപ്പെടുത്തിയേക്കും

ന്യൂസ് ബ്യൂറോ, കുവൈറ്റ്

കുവൈറ്റ് സിറ്റി :  പ്രവാസികൾക്ക് സ്വന്തമായി അനുവദിക്കുന്ന വാഹനങ്ങളുടെ എണ്ണം നിയന്ത്രിക്കാനുള്ള നിർദേശം അധികൃതരുടെ പരിഗണനയിലാണന്ന് പ്രാദേശിക ദിനപത്രം റിപ്പോർട്ട് ചെയ്യുന്നു .   റിപ്പോർട്ട് അനുസരിച്ച് , ആഭ്യന്തര മന്ത്രാലയത്തിലെ ട്രാഫിക് ഡിപ്പാർട്ട്‌മെൻ്റ്, സ്വകാര്യ ആവശ്യങ്ങൾക്കായി പ്രവാസികൾ അവരുടെ പേരിൽ രണ്ടിൽ കൂടുതൽ വാഹനങ്ങൾ രജിസ്റ്റർ ചെയ്യുന്നത് വിലക്കി ഉത്തരവ് പുറപ്പെടുവിക്കാൻ ഒരുങ്ങുകയാണ്.   കൂടുതൽ വാഹനങ്ങൾ ആവശ്യമുണ്ടെങ്കിൽ, അവർ ഒരു അപേക്ഷയുമായി ട്രാഫിക് വിഭാഗത്തെ സമീപിക്കുകയും ന്യായീകരണങ്ങൾ നൽകുകയും വേണം.  ഓരോ അധിക വാഹനത്തിനും അധിക ഫീസ് ഈടാക്കാം.

ലൈസൻസില്ലാത്ത വ്യാപാരം തടയുന്നതിനും മലിനീകരണം കുറയ്ക്കുന്നതിനും ഗതാഗതക്കുരുക്ക് പരിഹരിക്കുന്നതിനും വാണിജ്യ സമുച്ചയങ്ങളിലും മാർക്കറ്റുകളിലും വിവിധ പൊതുസ്ഥലങ്ങളിലും പൗരന്മാർക്ക് പാർക്കിംഗ് സ്ഥലങ്ങളുടെ ദൗർലഭ്യം പരിഹരിക്കുന്നതിനുമാണ് ഈ നടപടിയെന്ന് റിപ്പോർട്ടുകൾ പറയുന്നു.  കുവൈറ്റ് തെരുവുകളിൽ പ്രവാസികളുടെ ഉടമസ്ഥതയിലുള്ള കാലപ്പഴക്കം ഉള്ള  വാഹനങ്ങളുടെ വ്യാപകമായ സാന്നിധ്യമുണ്ടെന്നും ഇത് തിരക്ക്, , ഗതാഗത അപകടങ്ങൾ എന്നിവയ്ക്ക് കാരണമാകുന്നു.  ഈ വാഹനങ്ങൾ പാർക്ക് ചെയ്യുന്നതിന് സ്കൂളുകൾക്കും പള്ളികൾക്കും വാണിജ്യ സമുച്ചയങ്ങൾക്കും വേണ്ടി നിയുക്തമാക്കിയിട്ടുള്ള പൊതു ഇടങ്ങളും പാർക്കിംഗ് സ്ഥലങ്ങളും അവർ ഉപയോഗിക്കുന്നു.