കുവൈറ്റിലെ റോഡുകളിൽ ത്രിവർണ പതാക ആലേഖനം ചെയ്ത വാഹനങ്ങൾ ;   ‘ആസാദി കാ അമൃത് മഹോത്സവ്’ ബസ് കാമ്പയിൻ ആരംഭിച്ചു

ന്യൂസ് ബ്യൂറോ, കുവൈറ്റ്

കുവൈറ്റ് സിറ്റി: ഇന്ത്യയുടെ സ്വാതന്ത്ര്യത്തിന്റെ 75-ാം വാർഷികവും ഇന്ത്യയും കുവൈത്തും തമ്മിലുള്ള നയതന്ത്ര ബന്ധത്തിന്റെ 60-ാം വാർഷികവും പ്രമാണിച്ച് കുവൈറ്റിലെ ഇന്ത്യൻ എംബസിയിൽ ‘ആസാദി കാ അമൃത് മഹോത്സവ്’ ബസ് കാമ്പയിൻ ആരംഭിച്ചു. കുവൈറ്റിലെ ഇന്ത്യൻ അംബാസഡർ സിബി ജോർജ്ജും കുവൈറ്റിലെ ഇൻഫർമേഷൻ മന്ത്രാലയത്തിലെ ഫോറിൻ മീഡിയ റിലേഷൻസ് അസിസ്റ്റന്റ് അണ്ടർസെക്രട്ടറി മാസെൻ അൽ അൻസാരിയും സംയുക്തമായി  പരസ്യ കാമ്പയിൻ ഫ്ലാഗ് ഓഫ് ചെയ്തു. കുവൈറ്റിലെ 100  ബസുകളിൽ ഈ രണ്ട് നാഴികക്കല്ലുകളുടെ വാർഷികം ആഘോഷിക്കുന്നതിന് ത്രിവർണ പതാകയും ഇന്ത്യയിലെ അഭിമാന സ്തംഭങ്ങളും സ്മാരകങ്ങളും ആലേഖനം ചെയ്തിട്ടുണ്ട്.
  ഇന്ത്യയും കുവൈറും തമ്മിലുള്ള ഊർജസ്വലവും ചലനാത്മകവുമായ പങ്കാളിത്തത്തിന്റെ ആഘോഷമാണ് ഇന്നത്തെ പരിപാടിയെന്ന് അംബാസഡർ ജോർജ് പറഞ്ഞു.

ഇന്ത്യ-കുവൈത്ത് തനത് പങ്കാളിത്തത്തിന്റെ ഈ സമ്പന്നമായ ചരിത്രത്തിൽ 2021-22 വർഷത്തിന് ശ്രദ്ധേയമായ പ്രാധാന്യമുണ്ടെന്നും ഇന്ത്യയും കുവൈത്തും തമ്മിലുള്ള നയതന്ത്രബന്ധം സ്ഥാപിച്ചതിന്റെ 60-ാം വാർഷികത്തോടനുബന്ധിച്ച് ഒരു വർഷം നീണ്ടുനിൽക്കുന്ന ആഘോഷങ്ങൾ ഈ ബസ് കാമ്പെയ്‌നോടെ സമാപിക്കുന്നതായും അദ്ദേഹം പറഞ്ഞു. 2021 ജൂണിൽ ഇന്ത്യയുടെ വിദേശകാര്യ മന്ത്രി ഡോ. എസ് ജയശങ്കറിന്റെ കുവൈറ്റ് സന്ദർശന വേളയിലാണ് ഈ കാമ്പയിൻ ആരംഭിച്ചത്.

       മാസൻ അൽ അൻസാരി ഇന്ത്യയും കുവൈത്തും തമ്മിലുള്ള ചരിത്രപരമായ ബന്ധത്തെ അനുസ്മരിക്കുകയും എല്ലാ മേഖലകളിലെയും ബന്ധം കൂടുതൽ ദൃഢമാക്കാൻ ആഗ്രഹിക്കുന്നതായും പറഞ്ഞു . ഇരു രാജ്യങ്ങളും തമ്മിലുള്ള ബന്ധം ദൃഢമാണെന്ന് അദ്ദേഹം പറഞ്ഞു.  ഈ ബന്ധം നമ്മുടെ രാജ്യങ്ങളുടെ പരസ്പര പ്രയോജനത്തിനായി വികസിക്കുന്നത് തുടരുമെന്നും അദ്ദേഹം പറഞ്ഞു.

കോവിഡ് -19 ന്റെ പ്രയാസകരമായ സമയങ്ങളിൽ മെഡിക്കൽ ഓക്‌സിജൻ വിതരണം ചെയ്തുകൊണ്ട് കുവൈറ്റ് ഇന്ത്യക്ക് സഹായഹസ്തം നീട്ടിയതായി മുഖ്യാതിഥി അഭിപ്രായപ്പെട്ടു. ആ നിരാശാജനകമായ സമയങ്ങളിൽ ഇന്ത്യയും കുവൈറ്റിലേക്ക് മെഡിക്കൽ സംഘത്തെ അയച്ചു. ഇത് ഇരു രാജ്യങ്ങളും തമ്മിലുള്ള ആഴത്തിലുള്ള വേരോട്ടമുള്ള ബന്ധത്തെ സൂചിപ്പിക്കുന്നു.  ബസ് കാമ്പെയ്‌നിന്റെ ഭാഗമാകുന്നതിനും നൽകിയ പിന്തുണയ്‌ക്ക് ഇന്ത്യയിലെ സുഹൃത്തുക്കൾക്കും കുവൈറ്റ് അധികാരികൾക്കും അംബാസഡർ നന്ദി പറഞ്ഞു.