എൻഡോസൾഫാൻ ദുരിതബാധിതർക്ക് പ്രത്യേക പദ്ധതിയുമായി ‘സാന്ത്വനം കുവൈറ്റ്’ 

ന്യൂസ് ബ്യൂറോ, കുവൈറ്റ്

കുവൈറ്റ് സിറ്റി : നിരാശ്രരായ മനുഷ്യരുടെ നിസ്സഹായതകളിലേക്ക് ജീവകാരുണ്യ പ്രവർത്തനത്തിലൂടെ, സഹജീവി സ്നേഹത്തിന്റെ ഉദാത്ത മാതൃകയായി 22 വർഷങ്ങൾ പിന്നിട്ട “സാന്ത്വനം കുവൈറ്റ്” എല്ലാ വർഷാവസാനവും നടപ്പിലാക്കാറുള്ള സാമൂഹ്യ സേവന പദ്ധതിയുടെ തുടർച്ചയെന്നോണം ഈ വർഷത്തെ സ്പെഷ്യൽ പ്രോജക്ട് പ്രഖ്യാപിച്ചു.

കാസർഗോഡ്  ജില്ലയിലെ എൻഡോസൾഫാൻ ദുരിത ബാധിതർക്കായി “സാന്ത്വനം സെന്റർ” എന്ന പേരിൽ ഫിസിയോതെറാപ്പി /  റിഹാബിലിറ്റേഷൻ സെൻറർ പൂർണ്ണ പ്രവർത്തന സജ്ജമാക്കി സൗജന്യ സേവനം ഉറപ്പു വരുത്തുക എന്നതാണ്‌ ഈ വർഷത്തെ സ്പെഷ്യൽ പ്രൊജക്റ്റ് ആയി സാന്ത്വനം പ്രഖ്യാപിച്ചിരിക്കുന്നത്.

ഏകദേശം 50 ലക്ഷത്തോളം രൂപ ചിലവ് പ്രതീക്ഷിക്കുന്ന ഒരു പദ്ധതിയാണ് കാസർഗോഡ് ജില്ലയിലെ എൻമകജെ  പഞ്ചായത്തുമായി ചേർന്ന് സാന്ത്വനം കുവൈറ്റ്‌ ആവിഷ്കരിച്ചിരിക്കുന്നത്.

ഈ വർഷത്തെ സ്പെഷ്യൽ പ്രോജക്ട് ആയി സാന്ത്വനം ഏറ്റെടുത്തിരിക്കുന്ന ഈ സാമൂഹ്യ സഹായ പദ്ധതി,  കേരളത്തിൽ  നിത്യ ദുരിതമനുഭവിക്കുന്ന രോഗികൾക്കുള്ള സഹായമായി കരുതി കുവൈറ്റ് സമൂഹം ഏറ്റെടുക്കണം എന്ന് സാന്ത്വനം കുവൈറ്റിന്റെ ഭാരവാഹികൾ അഭ്യർത്ഥിച്ചു.