മുൻ അമീർ ശൈഖ് സബാഹിൻറെ ദേഹവിയോഗ ത്തിലുള്ള ദുഃഖാചരണം ഇന്ന് അവസാനിക്കും

Times of Kuwait

കുവൈത്ത് സിറ്റി: മുൻ കുവൈത്ത് അമീർ ശൈഖ് സബാഹ് അൽ അഹ്മദ് അൽ ജാബിർ അൽ സബാഹിന്റെ വിയോഗത്തോടെ രാജ്യത്ത് ഏർപ്പെടുത്തിയ 40 ദിവസത്തെ ദുഃഖാചരണം ശനിയാഴ്ച അവസാനിക്കും. മൂന്ന് ദിവസത്തെ അവധിയും 40 ദിവസത്തെ
ദുഃഖാചരണവുമായിരുന്നു പ്രഖ്യാപിച്ചത്. പൊതു ആഘോഷങ്ങൾക്ക് ഏർപ്പെടുത്തിയിരുന്ന വിലക്ക് നീങ്ങുമെങ്കിലും കോവിഡ് പശ്ചാത്തലത്തിൽ ഒത്തുചേരലിനുള്ള വിലക്ക് തുടരും.

കുവൈത്തിലെ വിവിധ മന്ത്രാലയങ്ങളിൽ സ്ഥാപിച്ചിരുന്ന ശൈഖ് സബാഹ് അൽ അഹ്മദ് അൽ ജാബിർ അസ്സബാഹിൻ ബോർഡുകൾ ശനിയാഴ്ച വൈകീട്ട് നീക്കും.
പുതിയ അമീർ ശൈഖ് നവാഫ് അൽ അഹ്മദ് അൽ ജാബിർ അൽ സബാഹിന്റെയും കിരീടാവകാശി ശൈഖ് മിശ്അൽ അൽ അഹ്മദ് അൽ ജാബിർ അൽ സബാഹിന്റെയും ചിത്രങ്ങളാണ് ഇനി മന്ത്രാലയങ്ങൾക്ക് അലങ്കാരമാവുക. സർക്കാർ ഓഫിസുകളിലെ ചിത്രങ്ങൾ നീക്കുമെങ്കിലും ജനമനസ്സുകളിൽ ശൈഖ് സബാഹ് അൽ അഹ്മദ് അൽ ജാബിർ
അൽ സബാഹ് എന്നും ജ്വലിക്കുന്ന ചിത്രമാവും.

വലിയ വെല്ലുവിളികളുടെ കാലത്ത് കുവൈത്തിനെ പുരോഗതിയുടെയും സമാധാനത്തിൻറയും പാതയിൽ നയിച്ചത് ചരിത്രത്തിൽ രേഖപ്പെട്ടുകഴിഞ്ഞു. അന്താരാഷ്ട്ര തലത്തിൽ പൊതുസ്വീകാര്യനായ നയതന്ത്ര പ്രതിനിധിയുടെ സ്ഥാനമായിരുന്നു മുൻ
അമീറിനുണ്ടായിരുന്നത്.