കുവൈറ്റിൽ തൊഴിൽ നിയമലംഘനത്തിന് പിടിയിലായവരുടെ എണ്ണത്തിൽ വൻ കുറവ്

കുവൈറ്റ് സിറ്റി: കുവൈറ്റിൽ തൊഴിൽ നിയമലംഘനത്തിന് പിടിയിലായവരുടെ എണ്ണത്തിൽ വൻ കുറവ്.രാജ്യത്ത് ഇഖാമ നിയമലംഘനത്തിന് ഈ വർഷം​ ​ 3953 പ്രവാസികൾ അറസ്റ്റിലായെന്ന് അധികൃതർ അറിയിച്ചു. സെപ്​റ്റംബർ അവസാനം വരെയുള്ള കണക്ക് പ്രകാരം ഇഖാമ നിയമലംഘനത്തിന് പിടിയിലായവർ ഭൂരിഭാ​ഗവും ഗാർഹികത്തൊഴിലാളികളാണ്.
സ്പോൺസർ മാറി ജോലിചെയ്​തതിനാണ്​ 2617 ​സ്വകാര്യ തൊഴിൽ വിസക്കാരെ പിടികൂടിയതെന്നും അധികൃതർ വ്യക്തമാക്കി. ആഭ്യന്തര മന്ത്രാലയം, മുനിസിപ്പാലിറ്റി, വാണിജ്യ മന്ത്രാലയം എന്നിവയുടെ പരിശോധനയിലാണ്​ ഇഖാമ നിയമം ലംഘിച്ചവർ പിടിയിലായത്​. രാജ്യത്തിന്റെ വിവിധ പ്രദേശങ്ങളിൽ 321 റൗണ്ട്​ പരിശോധനകളാണ്​ നടന്നത്​.

കൊവിഡ്​ വ്യാപന പശ്ചാത്തലത്തിൽ ഈ വർഷം പിടിയിലായവരുടെ എണ്ണം കുറവാണെന്നാണ് അധികൃതർ പറയുന്നത്. മുൻവർഷങ്ങളിൽ 30,000ത്തിന്​ മുകളിൽ ആളുകളെ പിടികൂടിയിരുന്നു​. അനധികൃത താമസക്കാരെ നാടുകടത്തുമെന്ന്​ അധികൃതർ അറിയിച്ചിട്ടുണ്ട്​.