ബാഡ്മിന്റൺ പ്ലയേഴ്‌സ് കുവൈറ്റിന്റെ (BPK) നേതൃത്വത്തിൽ “ഇഗ്‌ളൂ ബാഡ്‌മിന്റൺ സൂപ്പർ ലീഗ് സീസൺ-2” സംഘടിപ്പിക്കുന്നു .

കുവൈറ്റിലെ ബാഡ്‌മിന്റൺ പ്ലയേഴ്‌സിന്റെ ഔദ്യോഗിക കൂട്ടായ്‌മയായ ബാഡ്മിന്റൺ പ്ലയേഴ്‌സ് കുവൈറ്റിന്റെ (BPK) നേതൃത്വത്തിൽ നടത്തപ്പെടുന്ന “ഇഗ്‌ളൂ ബാഡ്‌മിന്റൺ സൂപ്പർ ലീഗ് സീസൺ-2” ഒക്ടോബർ 31, നവംബർ 1 തീയതികളിലായി അഹ്‌മദി ഐ-സ്‍മാഷ് ഇൻഡോർ കോർട്ടിൽ വെച്ച് നടത്തപ്പെടും. കുവൈറ്റിലുള്ള 8 പ്രധാന ടീമുകളായ സെൻട്രൽ ഹീറോസ് & ടസ്‌കേഴ്‌സ്, യുണൈറ്റഡ് സ്പോർട്സ് ക്ലബ്, ഇന്ത്യൻ സ്പോർട്സ് അസോസിയേഷൻ, റാപ്റ്റെർസ്, സഹാറ വിക്ടർ, പവർ സ്‍മാഷ്, ടീം – 5:30, ഏരീസ് കുവൈറ്റ് സെയിലേഴ്‌സ് തുടങ്ങിയ ടീമുകൾ ഈ മത്സരങ്ങളിൽ പങ്കെടുക്കും. കുവൈറ്റ്, അറബ്, ഇന്ത്യ, ഇന്തോനേഷ്യ, പാക്കിസ്ഥാൻ, ഫിലിപ്പീൻസ്, ശ്രീലങ്ക എന്നീ രാജ്യങ്ങളിൽ നിന്നുള്ള മുൻനിര താരങ്ങൾ ടൂർണമെന്റിൽ പങ്കെടുക്കുന്ന വിവിധ ക്ലബ്ബുകൾക്ക് വേണ്ടി കളിക്കുന്നു. ഈ വർഷത്തെ ടൂർണമെന്റിന്റെ മുഖ്യ സ്പോൺസർ ഇഗ്‌ളൂ കമ്പനിയാണ്.

ബാഡ്മിൻ്റൺ പ്ലെയേഴ്സ് കുവൈറ്റ് ഒരു ലാഭേച്ഛയില്ലാതെ പ്രവർത്തിക്കുന്ന ബാഡ്മിൻ്റൺ കായിക കൂട്ടായ്മയാണ്. കുവൈറ്റിലെ ബാഡ്മിൻ്റണിൻ്റെ വളർച്ച പ്രോത്സാഹിപ്പിക്കുക എന്നതാണ് ഞങ്ങളുടെ ആത്യന്തികമായ ദൗത്യം. കുവൈറ്റിലുള്ള 700+ കളിക്കാരുടെ റാങ്കിംഗ് നടത്തുകയും, പെയർ റൂളിംഗ് ഉൾപ്പടെയുള്ള കാര്യങ്ങൾ ക്രമീകരിക്കുകയും ചെയ്യുന്നു. വിവിധ ക്ലബ്ബ്കൾ, ജില്ലാ അസോസിയേഷനുകൾ ഉൾപ്പടെ കുവൈറ്റിൽ നടത്തപ്പെടുന്ന 90% ടൂർണ്ണമെന്റുകളിലും നമ്മുടെ റാങ്കിങ്‌ സമ്പ്രദായവും, ടൂർണമെന്റ് കലണ്ടറും, നിയമങ്ങളും ആണ് പിന്തുടരുന്നത്. സോഫ്‌റ്റ്‌വെയറിന്റെയും ഏറ്റവും പുതിയ സാങ്കേതികവിദ്യകളും ഉപയോഗിച്ച് ടൂർണമെൻ്റ് എങ്ങനെ മാനേജ് ചെയ്യാമെന്നതിനുള്ള പിന്തുണ ഞങ്ങളുടെ സാങ്കേതിക ടീം ഓരോ ടൂര്ണമെന്റിലും നൽകുന്നു. 2022 മുതൽ 35-ലധികം ടൂർണമെൻ്റുകൾ BPK മാർഗ്ഗനിർദ്ദേശങ്ങളോടെ നടത്തിയിട്ടുണ്ട്.

പ്രസ്മീറ്റിൽ ബിപികെയെ പ്രതിനിധീകരിച്ച് ഡോൺ ഫ്രാൻസിസ്, ജ്യോതിഷ് ചെറിയാൻ, അനീഫ് ലത്തീഫ്, ഉസ്മാൻ ഇടശ്ശേരി, പ്രകാശ് മുട്ടേൽ, സജീവ് പുന്നക്കൽ, തോമസ് കുന്നിൽ, ജ്യോതിരാജ്, വിമിൻ, ലിബു പായിപ്പാടൻ, ആനന്ദ് ശശിധരൻ എന്നിവർ പങ്കെടുത്തു.